Tekstur: Jónfinn Petursson Myndir: Páll Arni Berg Síggj myndarøð frá dystinum her.

Hóast vit liggja sera væl fyri í Vodafonedeildini var sera hugstoytt at síggja so fá fólk í Gundadali. Veit ikki um júst tilstundaða heimsmeistaraheitið í fótbólti er orsøkin, men dámligt er tað ikki.

HM ella ikki, 11. umfar var so bríkslað í gongd og eftir dagsins dyst, eru vit framvegis oddalið. Fyrri hálvleikur var nú ikki nakað at reypa av, meðan vit tóku okkum væl um reiggj í seinna og koppaðu alt á høvdið.

Símun hevði ein fínan møguleika beinanvegin, men smátt um smátt komu víkingar betur við og tóku yvir. Serliga Súni og Finnur høvdu nakrar møguleikar. Finnur átti at lagt gestirnar framum tá hann eftir misskiljing í okkara uppspæli slapp einsamallur avstað ímóti málinum. Í evstu løtu kom dagsins maður, Hans á Lag, fyri og fekk taklað bóltin frá Finni.

Tá stórur hálvur tími var leiktur kundu vit havt lagt okkum fram um, men skotið bleiv bjargað av verjuni og málmanninum í felag. Símun royndi seg aftur beint fyri hálvleik, men aftur var Geza Turi fyri og fekk bjargað út til horna.

Seinastu minuttirnar av fyrra hálvleiki komu vit betur við aftur og javnleikur var bara á góðari leið. Greitt var at vit máttu taka annað skinn um bak í seinna hálvleiki. Tað gjørdu vit eisini.

Fimm minuttir inn í seinna hálvleik skoraðu vit. Símun royndi seg við frísparki úr 25 metrum. Umvegis Tór-Ingar broytur bólturin kós og tess vegna snýtur Geza soleiðis at hann einki kundi gera.

Hetta hevði við sær at Víkingur flutti fólkið longur fram og gav hetta okkum betur pláss til skjótálop. Víkingur fekk tó gyltan møguleika at koma inn aftur í dystin tá dómarin bríkslaði Víkingini brotsspark. Súni var tó óheppin og sendi bóltin á stongina. Tá hann so royndi at skjóta enn einaferð, dømdi Dagfinn fríspark. Hetta má hann jú ikki.

Tá lítið korter var eftir sóu vit dagsins detalju tá føðingardagsbarnið, Andrew av Fløtum, diggidiggaði við Víkingaverjuni. Endin var tó at Geza Turi boksaði bóltin burtur, men enn einaferð vísti Andrew at eingin kemur honum til kníggja í bóltførleika.

Minuttin aftaná átti Súni Olsen at javnað. Tíverri fyri hann, skallaði hann uppum málið úr púra fríðari støðu. Næstu minuttirnar hendi ikki tað stóra.

Nakrar skiftingar vóru gjørdar. Á tímaslagnum kom Levi inn fyri Milan. Vagnur kom seinni inn fyri Tór-Ingar og ímóti dystarenda kom Jógvan Skeel inn fyri Andrew.

Sum sagt lúrdu vit eftir snarálopum og hetta gav úrslit í síðsta minutti. Levi bleiv sendur avstað. Hegnisliga snýtur hann síðsta verjuleikaran og roynur seg. Geza bjargar í fyrsta umfari, men Levi var klárur og sendur returin í netið. 2-0 og punktum.

Alt í alt, fult uppiborið og sera væl frágingið. Vit eru framvegis á fyrsta plássi, men mugu koyra á í sama anda. Longu mikukvøldið skulu vit út á Argir at leika ímóti lítlabeiggja.

Hetta verður annars ein strævin vika tí komandi sunnudag skulu vit inn til Runavíkar. Hetta verður sjálvandi eisini ein avgerandi uppgáva, men fyrst til Argir.

Vit gjørdu okkara í dag og harumframt hildu vit málið reint fyri fyrstu ferð í ár, á heimavølli. Sera gott og hjartaliga til lukku til okkum øll.

KOYR Á, HB !!!!