Tekstur: Eyðun Hansen Myndir: Heðin Weihe Lítil myndarøð frá dystinum kann síggjast her.

Veðurlíkindini í dag vóru betur enn 2. páskadag tá dysturin eftir ætlan skuldi verið spældur. Tó var bæði nakað av vindi og regni tá dysturin bleiv bríkslaður í gongd. Tó ikki verri enn so, at tað ikki nervaði dystin stórvegis.

Okkara menn høvdu vindin í ryggin í fyrra hálvleiki, men lat tað vera sagt beinavegin at okkara menn brúktu ikki vindin til at royna seg við skotum útifrá.

Men longu í 3. minutti var ein miskiljing millum ein av okkara verjuleikarum og Marcin, men tíbetur fekk verjan rudda burtur áðrenn tað bleiv vandamikið.

Í 7 minutti fær Levi Hanssen ein fríleypara móti málinum eftir frálíka fríspæling frá Andrew. Tíverri fyri okkum var Geza Turi sum ein køttur og fekk bjarga til horna. Tíverri fyri okkum var hetta ikki einastu ferð at Geza bjargaði Víkingum eftir at okkara menn komu einsamallir móti málinum hjá Víkingi. Fimm minuttir seinni er Andrew í fer við at krúlla seg ígjøgnum alla Víkingaverjuna, men í avgerðandi løtuni bleiv hann taklaður.

Miðskeiðis í fyrra hálvleiki hevði Víkingur eitt fríspark sum Súni Olsen leggur væl inn í feltið, har bólturin verður skallaður móti málinum, men Marcin stórbjargar bóltin uppum tvørtræið.

Í 28. minutti fær Fróði gult kort fyri at steðga Nenad eitt sindur harðliga tá Víkingar ætlaðu sær í skjótálop. Eitt sindur av tumulti er mitt á miðjuni, og endar tað við at Símun Samuelsen eisini fær ostaflísina, helst fyri at siga okkurt. Fyrri hálvleikur gekk annars rímuliga javnt á, men áttu vit helst munin í møguleikum.

Tá seinri hálvleikur byrjaði, var veðrið munandi batna og líkindini vóru fín til fótbólt. Um tað var tað betraða veðrið sum gjørdi tað at mennirnir á vøllinum tóku sær eitt sindur av løttum, skal vera ósagt, men fyrstu 10 minuttirnar hendi ikki nakað stórvegis.

Fyrsta royndin uppá mál í seinra hálvleiki kom frá Súna Olsen, sum úr rímuliga langari frástøðu, royndi seg við einum lobbi uppum Marcin, men tíbetur fyri okkara, so fór bólturin eisini eitt fitt petti uppum málið.

Í seinra hálvleiki havi eg noterað mær 3-4 brúkiligar royndir frá Víkingi, meðan okkara menn settu seg meira og meira á spælið og trýstu Víkingarspælararnar longur og longur aftur á vøllin, og var tað meira manglandi neyvleiki frá fleiri av okkara spælarunum, og so ein vælspælandi Geza Turi í Víkingamálinum sum uttan iva var besti Víkingaspælarin.

Serliga síðsta korterið var stórur munur á liðunum. Okkara menn hildu fram við at trýsta spælið langt inn á Víkingahálvuna, og frá áskoðaraplássunum virkaði tað næstan sum um Víkingar ikki vóru í nóg góðum formi enn, og vóru teir nokk eisini teir glaðaru tá Eiler bríkslaði fyri seinastu ferð.

Hóast vit enn eru plágaðir av fleiri skaðum, sum ger at nakrir spælarar spæla á minni vandum plássum, so vóru nógv positiv ting at taka við sær til næstu uppgávuna, sum verður á heimavølli móti argjamonnum.

KOYR Á, HB !!!!